• Panio: Walay Sala Ang Buang [Sagbayan]

    Niadtong nagdumala pa si kanhi Mayor Arthur Añana sa Sagbayan, may usa ka buang nga gitawag sa ngala'ng Panio. Si Panio magpermanentihan sa mercado sa Sagbayan.

    Mao kini pipila ka asoy nga mupaila sa postura ni Panio.
    •Magsul-ob siya'g sweater o di ba kaha jacket.
    •Magsigi'g pantalon.
    •Taason ug husto sa postura.
    •Hilomon
    •Usahay makit-an sa kalsada mag-jogging takna sa kahapunon.
    •Usahay usab magmartsa sa kalsada gamit ang kahoy gikulit pormag pusil nga maoy sagad gamiton namo pang C.A.T. kaniadto.
    •Apan ang labing makalilisang kay ang iyang estelo sa pagkabuang mao ang pagdaladala sa iyang mga koleksyon o hinipos nga mga sundang.

    May nangreklamo na mahitungod sa kanunay kuptan nga hinagibang makasamad ni Panio apan lagi kay di man manghilabot ug buotan man wala nalang embargohi. Gipasidan-an na siya nga di manghilabot ug misalig ang katawhan kay kini mituman man.

    Nabatasan kaniadto sa Sagbayan nga basta buang sugsugon sa mga tarong nga ingna ko kung bakakon nga bisan gani asang dapita mao man kini ang pagtratar kanila.

    Ang Domingo maoy usa ka dakong tigom sa tanang matang katawhan sa Sagbayan. Adto mag-abot ang mga mangumprahay ug mga magpapatigayon, mga sugarol ug mga mga manimbahay, ug mga ulitawo ug daga. Ang Domigo nagpabiling sadya hangtud nining mga panahona sa Sagbayan.

    Apan may usa ka Domingo nga nakapautingkay pag-ayo sa tibuok katawhan sa lungsod.Hapsay ang Domingo adtong panahona apan gikutaw kini ni Panio, ang buang.

    May pipila ka mga taga Calape matud pa nga murosmuros ang paninda nga hilabihan nakasungog ni Panio. Bisan dili kini panumbalingon ni Panio apan ania gayud ang mga tarung wala muondang pagsungog ug naburido ang ulo ni Panio.

    Ilawom sa jacket ni Panio mao ang tinagoang mahait ug tag-as nga kutsilyo. Mao nga sa kung kinsa ang iyang ikahinagbo sa iyang pagdagan-dagan sun-ok sa bagang katawhan sa mercado, iya gilayon kining duslakon. Ang mga tawo murag mga hulmigas nga muhaguros ug dagan kung magpaingon na si Panio. Ang mga tawo dapit sa munisipyo nagkasabot na nga ilang tabangan ug puspos kung magpaingon na. Ilang gipangbahinbahin ang among baligyang kahoy diin maoy ilang gihimong kahimanan. Apan sa pagsingabot hamag ni Panio magkalandrakas pagpanagan pahilayo ang hut-ong sa katawhang nanggidalag puspos.

    Ang among gibuhat kay duol man sa mercado among balay nanaka sa ibabaw ug nanira sa mga pultahan ug nagsud-ong sa mga tawo nga nagpunay'g panagan.

    May malabyahn na gani si Panio, dritso haslak naka kalas ug duha ka kinabuhi ug tulo ang nangaangol. May babaye nga misinggit, "hala! naay giluba...!" Apan pipila ka gutlo lamang nahibal-ang anak diay kini niya. Dili kapugngan nga kaisog ug di hitupngan nga kusog ang buang nga si Panio.

    Ang kapolisan naningkamot pagsikop ni Panio ug midagan kini ngadto sa kakahoyan. Gipabuthan kini ug nagpasalipod sa dakit. Gisundan kini ug nisulod sa langob. Ug nikabat ang pipila ka gutlo nga negosasyon nesurender ra gayod si Panio.

    Pinusasan, gidala kini sa Munisepyo. [Ang munisepyo niining higayona mao ang bag-o nga dapit sa silangan nahimutang kay nasunog naman ang daan.] Ug didto gipadangat sa masuk-anong mayor ang iyang kinumo sa nawong ni Panio tungod sa kahingawa sa iyang mga nabiktema. Apan si Panio nakasukol gamit ang iyang tuhod ug naigo sa itlog si mayor. Husto na! Igo na kadto ug wa na mubalos si mayor ug gidala si Panio kung asa siya dapat ipahimutang sa tinugyanan sa balaod.

    *Dili tinuod nga hulagway. Gikuha lamang alang paghatag ug hulagway sa sugilanon. Gikan ni Mikol.

0 comments:

Leave a Reply

SUBJECTS