• Ang Lungon [Clarin, Bien Unido]

    Tuig nga nahisulod sa 1993 hangtud 1998 nauso ang sugilanon sa lungon nga mangatang sa kalsada.

    Ang mga biyahedor sa gabei gikan sa Tubigon paingon sa Carmen nakatagamtam niini. May usa ka dekarga nga gikan sa Tubigon nibyahe paingun sa Carmen ug nihunong sa among tindahan [lungsod sa Sagbayan] kay nagpahilona sa kaugalingon gikan sa kakulba sa ilang nakitang puti nga lungon daplin sa kalsada dapit sa barrio Macaas, [sakop sa lungsod sa Clarin]. Ang ilang gihimo mao lamang pagbosena ug pag-abot gamay sa unahan nipabulhot kay gikuyawan naman sila. Sa ilang pagsugilon maila gayod sa ilang hulagway nga dili tinumutumo ang ilang estorya, kay nangaluspad man sila.

    Dili lamang sila kundili daghan ang nahitaboan niini lakip drayber sa habalhabal ug uban pa. Sanglit ang akong amahan usa ka magpapatigayon nga adunay igsuon sa Tubigon ug usahay magabeihan pagpauli. Apan wala gayud siya'y asoy mahitungod sa puti nga lungon ug muingon lamang nga wala gayod siya'y nakit-an.

    Sa susamang panahon may gibaniog usab sa lugar sa dapit sa Nueva Esperanza, barrio sakop sa lungsod sa Bien Unido]. Pag-abot sa tim-os nga kagabhion mag-atang sa kalsada ang makapanglimbawot sa balhibo nga puting lungon.

    Apan may naninda ug lungon sa maong dapit nga natingala siya nganong kuwangag usa ang iyang baligya. Iya kining gipanid-an ug maoy pauso sa mga bugoybugoy nga palainom didtong dapita nga manghulbot sa iyang baligyang lungon ug iatang sa kalsada. Sa dihang aduna nay mukaratil ug dagan magpunay'g pangatawa ang mga kagwang.

0 comments:

Leave a Reply

SUBJECTS